Arfanniat illuat 1783 missaaneersoq

Arfanniat illugisimasaat (B-40) Sisimiuni illut pisoqaanersaasa ilagivaat.  Illup oqaluttuassartaa siusinnerpaaq ersarluppq, maannakkulli inissisimaffigisaanut nuunneqanngikkallarmat, qanga allami inissisimagallarmat arfanniat illugisimagunarpaat. Niuertoqarfik Holsteinsborg Maannakkut Sisimiut 1764-imi inissisimaffianut nuunneqanngikkallarmat, Kangerluarsunnguup akiatungaani Asummiuni Amerloq-mik taaguutilimmi arfannianut illoqarsimavoq. Ajoqersuiartortup illua aamma tassani inissisimasimalluni. Qangaanerusoq titartakkat naapertorlugit, 1800-kkut aallartinneraniilli arfanniat illuat niuertoqarfik Holsteinsborg-imut ilaalereersimavoq, taamaattumillu arfanniat illuat siusinnerusukkut Asummiuniittuusimanissaa isumaqaqqajaanarsinnaalluni.

Illu quassuttuunik katiteriaannarnik sanaajuvoq, piffissallu ingerlanerani allilerneqarsimalluni, taamaattumillu massakkut marlunnik initaqarpoq. Illu ullumikkut toqqorsivittut atorneqarpoq.