Thulekulturi – piniarneq assartuinerlu

Thulekulturimeersut piniutaat assartuutigisimasallu pillugit saqqummersitat, Illutoqqami takuneqarsinnaapputtaaq. Ullutsinni kalaallit inunnit Thulekulturimeersunit toqqaannartumik kingoqqisuupput, ukioq 1200-ip missaani Alaskamit Canadamiillu Nunatta avannaanut nunasisimasut. Saqqaq- Dorset kulturimeersunullu sanilliullugit, Thulekulturimeersut teknikmik pitsaanerusumik atuisimapput, taamaalillutillu piniagassat amerlassusaasa nikerartarsimanerinut annertunerusumik sunnertittarsimanatik. Umiat, qaannat qimussillu patsisaallutik, Thulekulturimeersut sumiiffinnut piniagassaqarfiusunut nuttarsinnaanerinik periarfissaqartinneqarput, taamatullu isorartoorsuakkut piniakkaminnik angerlaassisinnaasarlutik. Kalaallit Nunaata kitaanit qimussit piniutillu saqqummersinneqarput.

Nunarsuarmioqatigiinnut Kingornussassat

Kingornutassiaqarfiit qangamiit kingornutassaraagut, ullumilu inunitsinniillutik, kinguaassatsinnullu ingerlateqqitassagut. Katersat kuluturikkut avatangiisimillu kingornussimasagut inuunermut isumassarsiornikkullu najoqqutassiatut atorsinnaasatsitulli pinngitsoorsinnaanngilagut.

Illutoqami UNESCO World Heritage Site Aasivissuit - Nipisat saqqummiineqarpoq. Nunarsuarmioqatigiinnut Kingornussassat Aasivissuit - Nipisannut Kalaallit Nunaata kitaani, Qaasuitsup Killeqarfiata nalaani inissisimavoq. Nunataata inuttaasalu oqaluttuassartai ukiuni 4,200-ni sinnerlugit utoqqaassuseqarput. Aasivissuit - Nipisat, qanga itsat Inuit aasarsiorfigisimasaanik, ukiivigisarsimasaanik, ungoorilluni tuttunniarfigisimasaanik, nunasiaataasimanerup nalaani illuliat aammattaaq meeqqat pinnguarfigisarsimasaannik imaqarpoq. Nunataq arfineq marlunnik annermik takusassaqartitsiveqarpoq, Nipisat qeqertaqarfianiit tuttunniarfittut tammaartarfiusimasup sermersuup tungaani inissisimasoq “Aasivissuit” tikillugit. Sumiiffik Inuit Kalaallit qangaanerusoq inooriaaserisimasaanik ullumikkullu inooriaaserisaata oqaluttuassartaanik ulikkaarpoq.

Folderi ataani takusinnaavoq