Innuttaasunik timmisartuussineq

Issittoq qulaallugu nunarsuarmi siullermeertumik innuttaasunik timmisartuussinermi Kangerlussuaq qulaanneqarpoq. 1954-imi SAS København-imiit Los Angeles-imut, Kangerlussuarmut, Taamani Søndre Strømfjord-imik taaneqartartumut, mikkallarluni siullermeertumik inunnik angallassivoq. Piffissami matumani katersugaasiviup illutaa, amerikkarmiunit qullersaqarfinngunngikkallarmat, SAS-imit transithotel-itut sanaartorneqarpoq.

SAS-ip immikkoortuani timisartuusat DC-8-55-nik marlunnik 1:25-imik angissusilerlugit qitiutinneqarput, tassani issittumi sumiissusersiornermik allakkisarnermillu oqaluttuassartaqarluni. Tassani ilaatigut franskit couture illuanit Carven-imit Christian Dior-imiillu ilusilersukkanik SAS-imi sulisut atisaat takuneqarsinnaapput. Saqqummersitani Grønlandsfly-mut (kingusinnerusukkut Air Greenland) tunngasunik immikkoortoqarpoq, ilaatigut sling operation-imik taaneqartartumik takutitsisoq, tassaalluni qulimiguulik usinik oqimaatsunik kivitseriarluni assartuisoq.