Illutoqaq (B-32) 1756-imi Ukiivik-mi (Sydbay) Sisimiut toqqavilerneqaqqaarneranit piusimavoq. Niuertoqarfik 1764-imi maannakkut inissisimaffianut nuunneqalermat, illu ilanngullugu nuunneqarpoq. Illutoqaq ullumikkut Sisimiuni illuni nutaannginnersaavoq. Illu quassuttuunik katiteriaannarnik sanaartugaaqqaarpoq, Norge-mi Bergen immikkoortumit Kalaallit Nunaannut nassiussaalluni. Piffissap ingerlanerani ujaqqanik qammalersorneqarpoq, avammut-kitaanut ujaqqanik allilerneqarluni.
1700-kkut qiteqqusimalernerani niuertoq nunasiamilu pisortaq Niels Egede (ajoqersuiartortup Hans Egede-p ernera) tassani najugaqarpoq. 1980-ikkut qeqqata missaani Sisimiut Katersugaasiviata pilersinneqarnissaata tungaanut, illu ilaatigut politeeqarfittut, iffiorfittut allakkerisarfittullu atorneqarsimavoq. Tassunga atatillugu illu annertuumik iluatungaatigut ilusitoqaatut iluarsartuunneqarpoq. Ullumikkut illup ilaa katersugaasiviup atajuartumik saqqummersitsiviatut atorneqarpoq.