Issuinnarmik illuliaq (B-1486) 1993-imi sanaajuvoq, ukiut 100-t matuma siorna missaani Sisimiuni nalinginnaasumik issuinnarnik illuliatut sanaqqitaalluni.
Niuertorutsip illuata qaliani saqqummersitani issuinnarmik illuliat kiisalu toqqit mikisunngorlugit takussutissiatut sanaajusut takuneqarsinnaapput, taakkulu ukiunik 100-nik pisoqaassuseqarput, kalaallimillu eqqumiitsuliortumit Gerth Lyberth-imit suliaallutik.
Ullumikkut Sisimiut eqqaa sinerlugu angalatilluni, issuinnarmik illukut assigiinngitsunik ilusillit arlallit naammattoorneqarsinnaapput, issuinnarmillu illuliat ineriartortinneqartuartuummata ilusaat malillugit qanoq pisoqaatiginersut ullulerneqarsinnaallutik. 1700-kkunni nunasiaanerup aallartinnerani, kalaallit ataatsimoorussamik illuni, ilaqutariinnit arlaqartunit najugaqarfigineqarsinnaasuni, najugaqartarsimapput. Ajoqersuinerup aallartinnerani inuit minnerusunik illuliortarnissaannik kaammattorneqalerput, tassa ukiuunerani illuni angisuuni qaminngaartarnerit ajoqersuisumit iluarineqanngimmata. Katersugaasiviup issuinnarmik illuutaa [link], ilaqutariinnut marluinnarnut naammattutut sanaqqitaasoq. Illu 1900-kkut aallartilaarnerani pisattanik pisatsersugaavoq, ullutsinnilu illoqarfiup meerartaanit nuannarineqarluartuulluni, qajartuusaarnermik sungiusanngikkaangamik, meeraaqqeriveqatitik peqatigalugit illermi nalaasaartarlutik.