Itsarnisat nassaarineqarsimasut paasisassarsiorfigikkit, ilaatigut Kalaallit Nunaanni qimmip allerua pisoqaanersaasoq.
Illutoqqami Sisimiunut nunasisut siulliit pillugit saqqummersitat takuneqarsinnaapput, tassaasut Saqqarmiut ukiut 2500-800 matuma siorna inuusimasut. Saqqarmiut tassaapput qanga inuit angalasartut, Sibiriamiit Alaskamiillu Kalaallit Nunaata avannaanut nunasisut, tamatumalu kingorna Kalaallit Nunaata kitaata sineriaanut siammartertut. Inuup sananeqaataanik misissuinerit (DNA) takutippaat maannakkut nunatsinni inuit, Thule-kulturimit kingoqqisuusut, Saqqarmiut sananeqaatsimikkut attuumassuteqanngitsuusut. Suna peqqutigalugu Saqqarmiut nungussimanersut paasisimaqqissaarneqanngilaq, silaannaalli allanngorsimanera, piniagassat niuerfissatigullu periarfissat allanngorsimaneri peqqutaaqataasimassapput.
Saqqummersitani aasivimmit Nipisat-nit, Sisimiut kujataatunginnguani inissisimasumit, itsarnisat nassaarineqarsimasut takusinnaavatit. Aasiviusimasumi uumasut piniarneqartartut saanerpassui innarlerneqarsimanngillat, tassanilu Saqqaq Kultur-imeersut nassaat nutaajunersaasut nassaarineqarsimallutik. Taamaattumik Sisimiut eqqaani Saqqarmiut sivisunerpaamik inuuffigisimasinnaagaat ilimanaateqarluni.
Kalaallit Nunaata kitaani inuit siulliit pillugit paasisimasatsinnik, Nipisat-ni assaanerup nutaanik paasisimasaqalersippaatigut, ukiut 4.500-t ingerlanerani sermersuup nunallu akorngani issittumi piniarfiusarsimasutut, Aasivissuit-Nipisat UNESCO-mit nunarsuarmioqatigiinnut kingornussassanngortinneqarnissaanut siunnersuutigineqarnerani qitiulluinnartutut inissisimasuulluni. Qimmit saarngi Nipisat-neersut, suliat akimorlugit Qimmeq pillugu suliniummi, kalaallit qimmii pillugit sananeqaatikkut kulturikkullu oqaluttuarisaanerinik misissuinermut ingerlatitseqqiinermullu ilaapput.